Ang Hinanahanap ko sa lalaki (Rebecca Añonuevo)

Ako’y ibigin mo

Laking matapang

Ang sundang ko’y pito

Ang baril ko’y siyam

-Leron, Leron Sinta

Ang hinahanap ko sa lalaki

Ay walang labis-walang kulang,

Walang maliw na katapangan.

Ang matapang na lalaki’y

May handogna pumpon ng liwanag.

Binibigkas ako sa bitag ng panghuhula

Kung ano ang kanyang iniisip.

Ang lalaking matapang ay hindi umiiwas

Madamtan ng sarili niyang luha

Sakaling datnan ng panahong

Kahit gaanong pag-iingat

Ay makasusubasob ang batong nagkalat,

Matalas at humihiwa sa mga pangarap.

Hahayaan niya akong makalipad.

Kailangan kong lakbayin ang sarili

At tipunin muli ang lakas.

Batid niyang nasasabik ako sa buga

Ng bungkos-bungkos na ulap

Na naghihintay sa lipos kong awit.

Maraming taon ang hahawiin ng aming sumpaan.

Magkaritmo ang tula at bisig,

Salit-salit, ang matapang na lalaki’y

Magmamakaawa at maninibasib,

Maghihimagsik at manginginig,

Sa sukdulang latay ng dahop at luwalhati.

Hanggang pumailanlang ang panaghoy ng wakas.

Ang matapang na lalaki’y muling mangungusap,

Tulad ko’y malulungkot, ngunit hindi matitinag:

Kung paanong nagtapat siya

Kung gaano ang kanyang pag-ibig

Gayon din, gayon din katapat

Ang inaasahan kng tinig -

“Hindi na kita iniibig”

–Bago ang Babae, 1999

---